NEET पेपरफुटी प्रकरणात RCC क्लासचे संचालक प्रा. शिवराज मोटेगावकर अटकेत; वर्षाला 100 कोटींची उलाढाल असलेल्या कोचिंग नेटवर्कवर सीबीआयची कारवाई
NEET UG Paper Leak Case: देशभरात चर्चेत असलेल्या NEET पेपरफुटी प्रकरणात सीबीआयने मोठी कारवाई करत लातूरमधील प्रसिद्ध RCC (Renukai Career Centre) कोचिंग क्लासचे संचालक प्रा. शिवराज मोटेगावकर यांना अटक केली आहे. तब्बल 11 तास चौकशीनंतर ही कारवाई करण्यात आल्याने शैक्षणिक क्षेत्रात मोठी खळबळ उडाली आहे.
RCC क्लासेसची राज्यभरात मोठी ओळख
RCC म्हणजेच Renukai Career Centre हे महाराष्ट्रातील NEET, JEE आणि MHT-CET परीक्षांसाठी मार्गदर्शन करणारे प्रसिद्ध कोचिंग नेटवर्क मानले जात होते. लातूर पॅटर्नमधील महत्त्वाचे नाव म्हणून प्रा. शिवराज मोटेगावकर यांची ओळख निर्माण झाली होती.
लातूरपासून सुरू झालेल्या RCC क्लासच्या शाखा पुढे पुणे, नाशिक, संभाजीनगर, नांदेड, सोलापूर, कोल्हापूर आणि अकोला यांसारख्या शहरांमध्ये विस्तारल्या. दरवर्षी NEET आणि JEE परीक्षांमध्ये RCC विद्यार्थ्यांचे मोठे यश होत असल्याचा दावा संस्थेकडून केला जात होता.
100 कोटींच्या टर्नओव्हरचा कोचिंग व्यवसाय
सूत्रांच्या माहितीनुसार, RCC कोचिंग नेटवर्कची वार्षिक उलाढाल सुमारे 100 कोटी रुपयांच्या घरात होती. मेडिकल आणि इंजिनिअरिंग क्षेत्रात प्रवेश मिळवून देणारी “फॅक्टरी” म्हणून या क्लासकडे पाहिले जात होते. महाराष्ट्रातील हजारो पालक आपल्या मुलांच्या भविष्यासाठी मोठी फी भरून RCC मध्ये प्रवेश घेत होते.
कोण आहेत प्रा. शिवराज मोटेगावकर?
प्रा. शिवराज मोटेगावकर हे लातूर जिल्ह्यातील रेणापूर तालुक्यातील साध्या शेतकरी कुटुंबातून पुढे आलेले शिक्षक आहेत. त्यांनी स्वामी रामानंद तीर्थ विद्यापीठ, नांदेड येथून एम.एस्सी. (केमिस्ट्री) शिक्षण पूर्ण केले.
महाविद्यालयीन शिक्षण घेत असतानाच त्यांनी होम ट्युशन सुरू केली. त्यातून मिळणाऱ्या उत्पन्नावर त्यांनी स्वतःचे शिक्षण पूर्ण केले. सुरुवातीला त्यांनी केमिस्ट्री विषयाचे स्वतंत्र क्लासेस सुरू केले आणि पुढे “सर्व विषय एकाच छताखाली” ही संकल्पना राबवत RCC नेटवर्कची उभारणी केली.
ते SET/NET-JRF, GATE, DRDO, BARC आणि TIFR सारख्या राष्ट्रीय स्तरावरील परीक्षांमध्ये यशस्वी झाल्याचा दावा RCC च्या अधिकृत माहितीत करण्यात आला होता.
ऑनलाईन शिक्षणामुळे राज्यभर विस्तार
कोरोना काळात RCC ने ऑनलाईन शिक्षण प्रणालीचा मोठ्या प्रमाणावर वापर केला. डिजिटल लेक्चर्स, ऑनलाइन टेस्ट सिरीज आणि आक्रमक जाहिरात मोहिमेमुळे RCC क्लासेसची लोकप्रियता झपाट्याने वाढली.
विशेषतः NEET परीक्षेसाठी RCC Pattern ही स्वतंत्र ओळख निर्माण करण्यात आली होती. दरवर्षी NEET परीक्षेत अनेक प्रश्न “गेस पेपर”शी जुळत असल्याचे दावे वारंवार केले जात होते.
NEET पेपरफुटी प्रकरणात नेमका आरोप काय?
- प्रा. शिवराज मोटेगावकर यांच्यावर परीक्षा सुरू होण्यापूर्वी प्रश्नपत्रिका मिळवल्याचा आरोप.
- विद्यार्थ्यांना उत्तरांसह प्रश्न उपलब्ध करून दिल्याचा संशय.
- NTA संबंधित काही व्यक्तींशी संबंध असल्याचा तपास.
- मोबाईल डेटा, चॅट्स आणि कॉल रेकॉर्ड्सची सीबीआयकडून चौकशी सुरू.
- पेपरफुटी संदर्भातील काही डिजिटल पुरावे मिळाल्याची माहिती.
- लाचलुचपत प्रतिबंधक कायद्यांतर्गत कारवाई करण्यात आल्याचे वृत्त.
सीबीआयच्या कारवाईमुळे शैक्षणिक क्षेत्रात खळबळ
महाराष्ट्रातील कोचिंग उद्योगामध्ये RCC हे मोठे नाव मानले जात होते. त्यामुळे या कारवाईनंतर विद्यार्थी, पालक आणि शैक्षणिक क्षेत्रात मोठी चर्चा सुरू झाली आहे. NEET परीक्षेच्या विश्वासार्हतेवर पुन्हा एकदा प्रश्नचिन्ह निर्माण झाले असून या प्रकरणात आणखी काही धक्कादायक खुलासे होण्याची शक्यता व्यक्त केली जात आहे.
टीप : संबंधित प्रकरणाचा तपास अद्याप सुरू असून अधिकृत यंत्रणेकडून पुढील माहिती समोर येणे बाकी आहे.
सौजन्य - ABP माझा
